Hipp hurra for Ricki 37 år!

Min kjære Ricki er 37 år i dag - og no kan ein vel trygt påstå at han ikkje er ein gut, men ein vaksen mann. Enda kor mykje 20-og-noko han føler seg. Iblant. Som seg hør og bør på ein bursdag, fekk han sove lenge. Eg trur faktisk han vakna før han vart vekt klokka ti i dag, med bursdagssong, bursdagsgåve og bursdagsfrukost på senga.

Alt fell i smak hos bursdagsmannen, og begge barna måtte prøve boksehanskane (korr: sekkehanskane). Eg trur kanskje musklane vaks på vesle Vetle berre av å prøve dei på hendene. Ricki derimot må nok nokre turar innom garasjen, kor boksesekken heng og garasjen etterkvart sitrar av slaga.

Ettermiddagen brukte vi ute i sommarleg vêr i dag. Vi trilla innover til Haakonsvern og gjekk opp Vassendvegen og innover i Alvøskogen. Ved ei lita slette stoppa vi og åt niste, og barna leika inne i skogen. Der fanst alt våre utebarn kan tenke seg; pinnar, steinar, konglar, klatretre - og insekt, til fryd og frykt.

Etter over ein time med mat, amming, undring og leik, gjekk vi vidare til Alvøyvatnet kor eit par ender fekk matrestane våre - og nokre kjekke ploppesteinar ploppa i vatnet. Etterpå gjekk turen heim att, kor pizzakveld og leggetid vart seinare enn forventa - forhåpentligvis betyr det ein seinare start på morgondagen (derimot har vel tendensane vore motsatt kvar gong kvelden blir sein, og likevel held vi fram med å håpe!)

Blidensol sov seg gjennom heile turen - med unntak av ei lita ammepause ved sletta. Bildet under er tatt før turen (ein kan vel ikkje berre vise sovebilder når vi trillar tur, ho er jo trass alt vaken innimellom).

♥ ♥ ♥